|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Қазақта ежелден ер адам – үйінің асыраушысы. Ал оның биік белестерді бағындырып, қаржылық дамуы көп жағдайда жанындағы жарына байланысты. Өйткені әйел – ерін жаңа жетістіктерге жетуге шабыттандырушы.
Бірақ арамызда күйеуінің дамуына кедергі келтіретін әйелдердің де бары рас. Оған себеп – әйелдің жағымсыз психологиялық әдеттері. Осы турасында белгілі психолог Марал Сарбасқызымен кеңесе отырып әйелдердің көпшілігіне тән психологиялық әдеттер жинақталған типтерді анықтап, назарыңызға ұсынып отырмыз. Ал қандай да бір типке жатып-жатпайтыныңызды саралап, сабақ алу немесе алмау сіздің еншіңізде.
Ішкі қорқынышы бар әйел. Ондай әйел жаңа дүниеден қорқу арқылы өзі соны аңдамастан күйеуінің жетістікке жету жолын бөгейді. Мысалы, күйеуі жұмысын ауыстырғысы келсе немесе бизнес бастауды ойға алса, әртүрлі себептерді алға тартып, оны ойынан айнытады. Ондай әйелдер күйеуіне қорқыныш пен үмітсіздік сезімін ұялатады. Уақыт өте келе ер адам да қаржылық жағдайдың нашарлауынан қорқып, батыл қадамдар жасай алмай қалады. Себебі қорқыныш жаңа дүниені байқап көруге, тәуекел етуге, жетекші қызметтерге орналасуға мүмкіндік бермейді. Нәтижесінде, ер адамның дамуы тоқтап, өмір бойы бір қызметке байланып қалуы мүмкін.
Әсіре үнемшіл әйел. Кейбір әйелдер барлық нәрседен үнем іздеп тұрады немесе ештеңеге ақшасын жаратқысы келмейді. Оның бірінші себебі сараңдық болуы мүмкін, бірақ әйел өзін үнемшілмін деп ойлайды. Екінші себеп – ертеңгі күннен қорқыныш. Яғни егер ақшаны бір нәрсеге жұмсаса, ертең ақшадан тарығып қаламын деп қорқу. Бұл мәселеде алдымен ішіңізге үңіліп, қай топқа жататыныңызды ажыратып алу маңызды. Сонымен қатар, жақсы киім алмай, азық-түлік алатын ақшаны да үнемдеп, күйеуіңізді бәрі жеткілікті деп сендіру де дұрыс емес екенін ескергеніңіз жөн. Сіз ол әрекетіңізбен күйеуіңізді қолдап, көтермелегіңіз келсе де, отағасына бәрі жеткілікті болып көрініп, табысын арттыру жолдарын іздемей қоюы мүмкін.
Түйінді шешу үшін күйеуіңізден мүмкін еместі сұрап, ақшаны ойланбай шашудың да қажеті жоқ. Жай ғана реті келгенде әдемі көйлек сатып әперуін қалайтыныңызды немесе косметологқа барғыңыз келетінін білдіруге болады.
Бәрін өздігінен жасауға ұмтылатын әйел. Әйелдің ауырлықты өз мойнына артып, барлығын өздігінен жасауға ұмтылуының астарында көп жағдайда сенбеушілік жатады. Оған әйелдің күйеуіне не баласына бір істі сеніп тапсыра алмауы мысал.
Әйелдің бар ауыртпашылықты өз мойнына артуының тағы бір себебі – міндеттерді бөле білмеуі немесе бөлуді қажет деп таппауы. Мысалы, бірінші топқа «сіз азық-түлікке барыңыз, ал мен үй жинайын» деп міндеттерді күйеуімен өзара бөлісе алмайтын әйелді жатқызсақ, екінші топқа міндеттерді бөлуді қажет деп таппай, барлығына өзім үлгерем деген әйелді жатқызамыз. Ол осы әрекетімен күйеуінен мақтау естуге ұмтылуы мүмкін. Ал біреуге ұнауға, әлдекімнің мақтанышы болуға тырысудың астарында көбіне өзін бағалау деңгейінің төмендігі және өз іс-әрекетіне қанағаттанбау жатады. Оған қоса, ондай әйелдер күйеуіне өз потенциалын көрсетуге мүмкіндік бермейді. Сәйкесінше, еркекте қаржылық өсу де болмайды.
Әйелдің күйеуіне беретін мотивациясы ерінің жаны мен тәніне тыныштық сыйлап, оны өзінің ой-өрісі, сөйлеу мәнері, мәдениеті, сырт келбеті және іс-әрекетімен шабыттандырып, ынталандырудан және кей кезде ғана бағыттаудан құралатынын ұмытпау керек.
Қандай жағдайда да ерін ақтап алатын әйел. Кейбір нәзік жандылар күйеуінің барлық сәтсіздіктерін ақтап алуға бейім тұрады. Оның себебі – ерінің қателігін көргісі келмеуі. Өйткені күйеуінің қателігін көріп, түсініп, қабылдаған уақытта әйел өзін жайсыз сезінеді. Сондықтан бұл жағдайды қабылдамас үшін әртүрлі ақтап алу формаларын ойлап табады. Оның бірі – басқаларды кінәләу. Мысалы, күйеуінің жұмыстағы сәтсіздігі үшін басшысына немесе күйеуінің қызметте өсуіне жәрдем бермеген туыстарына айып тағады. Бірақ бұл әрекет мәселені шешуге көмектеспейді. Себебі әйел ер азаматына жағдайды дұрыс бағамдап, оның түйінін анықтау арқылы мәселені шешу жолдарын табуына мүмкіндік бермейді. Ондай әйел үнемі өзін де, күйеуін де алдап жүреді. Уақыт өте келе күйеуі де барлығы оған емес, сыртқы факторларға байланысты деп ойлап, күресуді доғарады.
Күйеуін жазғыра беруге әдеттенген әйел. Ерін жазғырып, кінәләй беретін әйелдің бойында бірінші кезекте өзіне деген сенімсіздік бар. Ол қандай да мәселені өзі шеше алмайды немесе шешкісі келмейді. Нәтижесінде, өз эмоциясын күйеуіне шығарып, оны айыптап, сәтсіздіктерін бетіне басып, ауыр сөздер айтады. Мұндай әйел күйеуінің табысын арттыруға деген құлшынысын тоқтатып қана қоймай, ерте ме, кеш пе ерінің оған деген сенімін өшіріп, сезімін суытады. Ұрыс кезінде айтылған сөздер ұмыт болуы мүмкін. Бірақ сол сөздер айтылған уақытта адамның басынан кешкен эмоциясы ұмытылмайды. Яғни жағымсыз эмоцияны жиі сезінетін ер азамат бейсаналы түрде сондай эмоцияның тууына себепші әйелден алыстай береді.
Кез келген ер адамға әйелінен шынайы мақтау есту, әйелінің оған деген сенімін, қолдауы мен махаббатын сезіну маңызды. Өйткені бұл оған ең биік белестерді бағындыруға күш береді.
Жансая ҚАМБАР
Тағы көру
