|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Джефф Безосқа тиесілі Blue Origin компаниясының New Shepard зымыраны Техастағы ғарыш айлағынан ұшырылып, алты әйел ғарышқа жол тартты, - деп хабарлайды Dauletten.kz.
Экспедиция құрамында Безостың қалыңдығы Лорен Санчес, CBS арнасының жүргізушісі Гейл Кинг, NASA-ның бұрынғы зымыран инженері Айша Бо, азаматтық құқық қорғаушы Аманда Нгуен, продюсер Керриан Флинн және танымал әнші Кэти Перри болды.
New Shepard кемесі таңғы 8:30-да көкке көтеріліп, Жерден шамамен 100 шақырым биіктікте орналасқан Карман шекарасына жетті. Автоматтандырылған ғарыш кемесі осы межеге дейін тігінен көтеріліп, содан кейін капсула зымыраннан бөлініп шығып, парашют және тежегіш жүйелерінің көмегімен сәтті жерге қонды. Барлығы 11 минутқа созылған бұл сапар туристік мақсатта ұйымдастырылды.
Бүгінге дейін бұл бағдарлама аясында 52 адам ғарышты бағындырды. Алайда компания New Shepard-тағы бір орын құнын әлі жария еткен жоқ. Ұшу кезінде Кэти Перри Луи Армстронгтың “What a Wonderful World” әнін орындаған. Сондай-ақ, ол өзімен бірге түймедақ гүлін ала барған – әншінің қызының есімі Дейзи, яғни түймедақ дегенді білдіреді.
Жерге оралған кезде Кэти Перри мен Гейл Кинг тізерлеп, жерді сүйді. Айша Бо капсула ішіндегі қуатты сезініп, ғарышқа жеткен сәтте әйелдердің бір-біріне қарап, ерекше әсерге бөленгенін айтты. Сонымен қатар, Айша Бо Багам аралдарынан ғарышқа ұшқан алғашқы әйел ретінде тарихта қалды.
Алдағы уақытта Blue Origin Илон Масктың SpaceX компаниясымен тікелей бәсекеге түсіп, ғарыш туризмін дамытуға ниетті. Сарапшылар бұл саланың негізгі тартысы Маск пен Безос арасында өтетінін алға тартады. Айта кетейік, SpaceX-тің Falcon 9 зымырандары 469 мәрте ұшырылса, Blue Origin әзірге New Shepard аппаратын 31 рет қана сәтті ұшырған.
