Жаңалықтар

Қазақстанда әрбір бесінші оқушы артық салмақ жинаған: мамандар дабыл қақты

09.10.2026

мин

0

106

Сурет: media.com

Қазақстандағы мектеп оқушыларының 20 пайыздан астамында артық салмақ бар, ал 6 пайыздан астамы семіздікке шалдыққан. Мамандар балалардың қантты сусындарды жиі тұтынуы мен зиянды тағам жарнамасының таралуына назар аударды, — деп хабарлайды Dauletten.kz.

Қазақстанда балалар арасындағы артық салмақ мәселесі алаңдатарлық деңгейде қалып отыр. Ұлттық зерттеулердің нәтижесі бойынша, мектеп оқушыларының бестен бірінен астамының салмағы қалыпты мөлшерден жоғары. Ал 6 пайыздан астамы семіздікке шалдыққан. Бұл туралы Ұлттық қоғамдық денсаулық сақтау орталығы басқарма төрағасының орынбасары Жанар Қалмақова мәлімдеді.

Маманның айтуынша, артық салмақ мәселесі ересектер арасында да кең таралған. Елдегі ересек тұрғындардың 20 пайыздан астамы семіздікке шалдыққан, ал 55 пайыздан астамының салмағы қалыпты көрсеткіштен жоғары.

Балалардың қантты сусындарды тұтынуы жиілеген

Зерттеу деректеріне сәйкес, мектеп оқушыларының 17 пайыздан астамы қант қосылған сусындарды аптасына 6–7 рет ішеді. Яғни, балалардың бір бөлігі мұндай сусындарды күн сайын тұтынады.

Бұған қоса, зиянды тағамдарды жарнамалау мәселесі де өзекті болып отыр. Жанар Қалмақованың мәліметінше, зерттелген жарнамалардың 72 пайызы денсаулыққа пайдалы емес тағамдарды насихаттауға бағытталған.

Маман балалардың тамақтану әдетіне ата-аналардың да ықпалы бар екенін атап өтті. Кейбір ата-ана баласын жақсы баға алғаны немесе жетістікке жеткені үшін фастфуд мейрамханасына апарып, мұндай тағамдарды сыйлық ретінде ұсынады. Бұл баланың зиянды тағамдарға деген қызығушылығын арттыруы мүмкін.

Сондықтан маман дұрыс тамақтану дағдысын ерте жастан қалыптастыру маңызды екенін айтты. Бұл үшін ата-аналар, мектептер және қоғам бірлесе әрекет етуі қажет.

Ауруларға жұмсалатын шығын триллион теңгеден асады

Қазақстанда жұқпалы емес аурулардың алдын алу да маңызды міндеттердің бірі саналады. Олардың қатарына жүрек-қан тамырлары аурулары, онкологиялық дерттер, қант диабеті және өкпенің созылмалы обструктивті ауруы кіреді.

Жанар Қалмақованың айтуынша, осы ауруларды емдеу мен бақылауға жұмсалатын шығын 2,3 триллион теңгеге жетеді. Бұл елдің жалпы ішкі өнімінің 4,5 пайызына тең.

Дүниежүзілік денсаулық сақтау ұйымының деректеріне сүйенген маман денсаулықтың 55 пайызы өмір салтына байланысты екенін атап өтті. Осыған байланысты дұрыс тамақтану мен салауатты өмір салтын ұстану аурулардың алдын алуда маңызды рөл атқарады.