Жаңалықтар

Семейде соққыға жығылған оқушының жағдайы туралы дәрігерлер пікір білдірді

27.02.2025

1 мин

0

116

Абай облыстық денсаулық сақтау басқармасы Семейде жарақат алған оқушының жағдайы туралы мәлімет берді, - деп хабарлайды Dauletten.kz.

Ведомствоның хабарлауынша, оқушы 23 ақпанда медициналық тексеруден өткен.

- Пациент – 2013 жылы туған ұл бала. Оған дер кезінде медициналық және психологиялық көмек көрсетілді. Қажетті тексерулер жүргізілді. Диагнозы – жабық бас-ми жарақаты (ЖБМЖ). Бастың шашты бөлігінде, шүйде тұсында гематома бар. Төменгі аяқ-қолдарында да көптеген теріасты гематомалары анықталды. Бала жағдайы салыстырмалы түрде қанағаттанарлық, бірақ психоэмоционалдық күйі мен диагнозына байланысты бақылауды қажет етеді, – деп хабарлады облыстық денсаулық сақтау басқармасының өкілдері Instagram-дағы ресми парақшасында.

Мекеменің мәліметінше, қажетті диагностикалық тексерулер жүргізілген, оқушының өміріне қауіп төндіретін жағдайлар анықталмаған. Ол тіркелген емханасы арқылы толық медициналық және психологиялық көмек алған.

- Қазіргі таңда бала дәрігерлер – педиатр, травматолог және невропатологтың тұрақты бақылауында, – делінген хабарламада.

Жасөспірімге жасалған шабуыл туралы

24 ақпанда әлеуметтік желілерде Семейде жасөспірімдердің қатарластарын аяусыз соққыға жыққаны туралы видео тарады. Полиция бұл оқиға бойынша қылмыстық іс қозғалғанын, барлық қатысушылардың дереу анықталып, ата-аналарымен бірге полиция бөліміне жеткізілгенін мәлімдеді.

Кейін балалар омбудсмені Динара Зәкиева Абай облысының әкімі Берік Уәлимен кездесіп, кәмелетке толмағандар арасындағы қылмыстың алдын алу және Семейдегі оқиғаға қатысты мәселелерді талқылады.

Бүгін Абай облысының әкімі Берік Уәли Семей қаласындағы мектеп оқушылары арасындағы жанжалға байланысты жиын өткізді. Басқосуға прокуратура, полиция департаменті, білім басқармасы басшылары мен бала құқықтарын қорғау жөніндегі уәкіл қатысты.

Облыстық білім басқармасының мәліметінше, оқиғаға байланысты мектеп директоры қызметінен босатылған.