Жаңалықтар

Балаларына алимент төлемеген Әйтенов қымбат көлігінен айырылды

08.11.2024

мин

0

322

Сурет: видеодан алынған скрин

Марат Әйтенов алимент бойынша қарызын өтемегендіктен Mercedes автокөлігінен айырылды, - деп хабарлайды Dauletten.kz.

Бұл туралы Астана қаласындағы жеке сот орындаушылары мәлімдеді. Олардың деректеріне сәйкес, Әйтенов балаларына 23 миллион теңге қарыз.

Көлік сатылымға қойылып, одан түскен қаражат қарызды жабуға жұмсалмақ. Марат Әйтеновтің бұрынғы әйелі Дана Әтешова бұрынғы күйеуінің бұл автокөлікті жасырмақ болғанын айтады. Оның айтуынша, Әйтенов сол үшін бұрынғы жеке сот орындаушымен келіскен екен.

Еске сала кетсек, бұған дейін Марат Әйтеновке қатысты қылмыстық іс қозғалып, ол 5 тәулікке қамалған болатын.

- Құқық бұзушы өз кінәсін мойындаған жоқ. Ол бұрынғы жұбайы балаларды бермей, оларды өз қолдарымен ұстап қалғанын мәлімдеді. Әйтенов балаларды алып кету үшін жердегі әйелдің аяқтарынан тартқанын айтты. Ол әдепсіз сөз айтпағанын және оны ұрмағанын ерекше атап өтті, – деді сотта.

Соттың ақпараты бойынша жәбірленуші бұрынғы күйеуінің оны көшіру кезінде заңды бұзып, шабуыл жасап, денесіне зақым келтіргеніне шағымданған. Құқық бұзушылық туралы айғақтар әкімшілік құқық бұзушылық хаттамасы, бейнежазба және жәбірленушінің түсіндірмелері арқылы расталған.

- ӘҚБтК-нің 73-бабының 1-бөлімі ескерту немесе 5 тәулікке қамау түріндегі жазаны қарастырады. Жоғарыда келтірілген жағдайларды, сонымен қатар құқық бұзушының іс-әрекетінің қоғамға кері әсерін ескере отырып, құқық бұзушы ӘҚБтК-нің 73-бабының 1-бөлімі бойынша кінәлі деп танылды. Оған 5 тәулікке қамау жазасы тағайындалды. Шешім әлі заңды күшіне енген жоқ, - делінген ақпаратта.

Кейінірек Марат Әйтенов экс-әйелін өзін тістеп алғаны үшін сотқа берді. Әтешова оны үйден шығару кезінде үй иесіне қарсылық көрсетіп, Әйтеновті ішке кіргізбей, қасақана телефонымен соққан және оны тістеген.

Салдарынан Марат Әйтенов дене жарақатын алған. Әтешованың кінәсі жәбірленушінің, куәгерлердің айғақтары, сот-медициналық сараптама және іс материалдары арқылы дәлелденді.

Тараптардың ұстанымы. Прокурор 30 АЕК мөлшерінде айыппұл салуды сұрады. Қорғаушы тарап оқиға мен қылмыстық құқық бұзушылық құрамының жоқтығына байланысты істі тоқтатуды өтінді.

ҚК-нің 108-1-бабының 1-бөлімі бойынша 200 АЕК-ке дейінгі айыппұл, түзеу жұмыстары, 200 сағатқа дейінгі қоғамдық жұмыс немесе 50 тәулікке дейін қамау қарастырылған. Сот жеңілдететін жағдай ретінде сотталушының жас балалардың болуы мен бұрын сотталмағанын есепке алды. Ауырлататын жағдайлар анықталған жоқ.

Сот Әтешоваға 20 АЕК көлемінде айыппұл салды, себебі сотталушы жеке кәсіпкер және оның асырауында үш жас баласы бар, жазаның басқа түрі балалардың жағдайына кері әсер етуі мүмкін деп танылды.