Жаңалықтар

“ҚазАвтоЖол” экс-басшысы 8 жылға сотталды

18.12.2024

1 мин

0

213

Сурет: inbusiness

Астанада сот "ҚазАвтоЖол" ұлттық компаниясының бұрынғы басқарма төрағасы Асқар Мұратұлы мен кәсіпкерге қатысты қылмыстық істі аяқтады. Істің мән-жайын елордадағы қылмыстық істер жөніндегі ауданаралық сот ашып берді, - деп хабарлайды Dauletten.kz.

Тергеу мәліметтері бойынша:

Асқар Мұратұлы мен екінші айыпталушы қызмет бабын пайдаланып, аса ірі мөлшерде бөтеннің мүлкін ысырап етті деп айыпталды (ҚР ҚК 189-бабы, 4-бөлімі, 2-тармағы).

Іс туралы не белгілі?

Тергеу барысында Асқар Мұратұлы мен кәсіпкер Ж. 2000 жылдардан бері таныс екені анықталған. Мұратұлы әр жылдары түрлі басшылық лауазымдар атқарған:

• 2017-2019 жылдары Ақмола облысының жолаушылар көлігі және автомобиль жолдары басқармасын басқарған;
• 2019-2021 жылдары облыс әкімінің орынбасары қызметін атқарған.

Қызмет барысында ол жол инфрақұрылымындағы мәселелерді, соның ішінде Жақсы–Есіл–Бұзылық автожолындағы Есіл өзені арқылы өтетін көпірдің апатты жағдайын жақсы білген.

2019 жылы Мұратұлы облыс әкімінің орынбасары болып тағайындалғаннан кейін, "ҚазАвтоЖол" ҰК АҚ Ақмола филиалы мен айыпталушы Ж.-ның атынан өкілдік еткен "Асыл-ЖАС" ЖШС арасында көпірді жөндеуге 2,2 миллиард теңгеге келісімшарт жасалған.

Сот деректері бойынша:

Келісімшарт сомасы мердігерге аударылмаған. 2021 жылдың сәуірінде Асқар Мұратұлы "ҚазАвтоЖол" ұлттық компаниясының басқарма төрағасы болып тағайындалған. Маусым айында тапсырыс берушінің бастамасымен келісімшарт бұзылып, "Асыл-ЖАС" компаниясы бұл шешімді сотта дауламай, үнсіз қалды.

Сол жылы Мұратұлы "ҚазАвтоЖол" басқарма төрағасы ретінде қайтадан "Асыл-ЖАС" компаниясымен келісімшарт жасасу мәселесін көтеріп, бір көзден сатып алу тәсілімен келісімге келген. Соттың айтуынша, бұл шешімнің негізі жоқ болған.

2021 жылғы 20 қазанда Мұратұлы Асыл-ЖАС" директоры Ж.-ның бұрынғы келісімшарт бойынша қарызды талап етуі мүмкін деген сылтаумен, 2,2 миллиард теңгеге жаңа келісімшарт жасасуға бұйрық берген.

Сот деректеріне сәйкес, мердігер ретінде таңдалған консорциум қаржылай тұрақсыз болған және келісімшартты орындауға мүмкіндігі болмаған. 2021 жылғы 28 желтоқсанда "Асыл-ЖАС" ЖШС-нің есепшотына 200 миллион теңге аванс аударылған, бұл қаржы кейін ұрланып, талан-таражға салынған.

Сот үкімі:

Сот Асқар Мұратұлы мен екінші айыпталушы Ж.-ны кінәлі деп тауып, оларға келесі жаза тағайындады:

• Асқар Мұратұлы 8 жылға бас бостандығынан айырылды, өмір бойы мемлекеттік қызметте және квазимемлекеттік секторда қызмет атқару құқығынан айырылды.
• Ж. 8 жылға сотталып, мүлкі тәркіленіп, 10 жылға дейін коммерциялық ұйымдарда басшылық қызмет атқаруға тыйым салынды.

Сонымен қатар, сот "ҚазАвтоЖол" ұлттық компаниясының азаматтық талабын қанағаттандырды. Үкім заңды күшіне енген жоқ.