Жаңалықтар

Ертең жеті партия тікелей эфирде теледебат өткізеді

11.08.2026

мин

0

207

Сурет: ozgeris.info

12 тамыз күні сағат 20:00-де Jibek Joly телеарнасында алғашқы командалық телевизиялық дебат өтеді. Тікелей эфирде бірінші тарихи Құрылтай сайлауына қатысатын жеті саяси партияның өкілдері пікірталас алаңына шығады, — деп хабарлайды Dauletten.kz.

Қазақстанның саяси өмірінде жаңа форматтағы пікірталас ұйымдастырылмақ. Бұл жолы партия өкілдері жеке емес, командалық құрамда сынға түседі.

Теледебаттың негізгі тақырыбы – «Заң мен тәртіп – әділетті Қазақстанның негізі». Тікелей эфирге бірінші тарихи Құрылтай сайлауына қатысып жатқан жеті саяси партияның өкілдері шығады.

Дебатқа қатысатын командалар:

• «Әділет» партиясы – Айжан Аймағанова мен Мәди Мырзағараев;
• ЖСДП – Лариса Ли мен Нұрайнаш Камалова;
• «Байтақ» партиясы – Амалбек Өміртай мен Алмат Тұртаев;
• Қазақстан Халық партиясы – Жандос Бидайбеков пен Ирина Смирнова;
• «Ауыл» партиясы – Жазира Сұлтанқұлова мен Ерболат Саурыков;
• «Ақ жол» партиясы – Бек-Мұхамед Жаукебаев пен Ермек Әбілдин;
• Respublica партиясы – Олжас Құспеков пен Динара Шүкіжанова.

Пікірталас барысында қатысушылар өз бағдарламаларының басымдықтарын түсіндіріп, сайлаушылардың сеніміне ие болуға тырысады. Ұйымдастырушылар эфирде тек дайындалған сұрақтар ғана емес, көрермендерден тікелей түсетін сауалдар да қойылатынын хабарлады.

Бағдарламада партиялардың сайлауалды бастамаларына салыстырмалы талдау жасалып, олардың әлсіз және күшті тұстары талқыланады. Сонымен бірге әр партия өз өкілеттік мерзімінде жүзеге асыруға міндеттенетін бір нақты уәдесін жариялайды.

Көрермендер пікірталасқа экрандағы QR-код немесе WhatsApp арқылы қатысып, өз сұрақтарын жолдай алады.

Теледебат аяқталған соң эфирде «Ашық студия» саяси ток-шоуы көрсетіледі. Онда сарапшылар пікірталастың мазмұнын, қатысушылардың аргументтерін және бұл форматтың сайлау науқанына ықпалын талдайды.

Жаңа форматтағы алғашқы командалық теледебатты 12 тамыз күні сағат 20:00-де Jibek Joly телеарнасынан және арнаның ресми YouTube платформасынан көруге болады.